મુંબઈઃ રાજ્ય સરકાર દ્વારા રિક્ષા અને ટેક્સી ચાલકો માટે ' ફરજિયાત મરાઠી 'ના નિર્ણયને હવે સમર્થન મળી રહ્યું છે. પરિવહન પ્રધાન પ્રતાપ સરનાઈકે 1 મેથી કડક અમલ કરવાનો આદેશ આપ્યો છે.
હવે, મહારાષ્ટ્ર નવનિર્માણ સેના (મનસે) આ નિર્ણયના સમર્થનમાં ઉતરી છે અને મનસે દ્વારા અંધેરી પશ્ચિમમાં રિક્ષાઓ પર સ્ટીકરો લગાવવાનું અભિયાન શરૂ કરવામાં આવ્યું છે. આ અભિયાનને મુસાફરો તરફથી સારો પ્રતિસાદ મળી રહ્યો હોવાનું બહાર આવ્યું છે.
આ ઝુંબેશ મનસેના અંધેરી પશ્ચિમ વિભાગના પ્રમુખ મનીષ ધુરી અને મનસે (મહારાષ્ટ્ર નવનિર્માણ વિદ્યાર્થી સેના)ના ઉપાધ્યક્ષ કુશલ ધુરીના નેતૃત્વમાં અમલમાં મૂકવામાં આવી રહી છે.
આ ઝુંબેશમાં રિક્ષાની પાછળ સ્ટીકરો લગાવવામાં આવે છે. આ સ્ટીકરો પર સ્પષ્ટ અને બોલ્ડ શબ્દોમાં સંદેશ આપવામાં આવ્યો છે. "હું મરાઠી બોલું છું, હું મરાઠી સમજું છું, આવો મારી રિક્ષામાં બેસો!"
કેટલાક બિન મરાઠી રિક્ષા સંગઠનોએ આ નિર્ણયનો વિરોધ કર્યો છે, તો મનસેના આ પગલાથી મરાઠી ભાષી રિક્ષા ચાલકોમાં ઉત્સાહનું વાતાવરણ ઉભું થયું છે. મનીષ ધુરી અને કુશલ ધુરીએ કહ્યું કે જો કોઈ મહારાષ્ટ્રમાં રિક્ષા ચલાવવા માંગે છે, તો સ્થાનિક ભાષા જાણવી જરૂરી છે અને આ ઝુંબેશનો મુખ્ય ઉદ્દેશ્ય મુસાફરો માટે મરાઠી બોલતા ડ્રાઇવરોને પ્રાધાન્ય આપવાનો છે. મનસેના આ 'સ્ટીકર' ઝુંબેશને કારણે, મુંબઈમાં 'મરાઠી વિરુદ્ધ અમરાઠી' વિવાદ ફરી એકવાર ચર્ચામાં આવ્યો છે.
